Uz osmijehe, polumaturanti OŠ „Ilija Kišić“ obilježili su kraj jednog životnog poglavlja. Prije proslave u Gradskoj kafani, učenici su defilovali od Dvorane Park, gdje su ih pozdravili roditelji, nastavnici i drugari.
Direktorica, Jelena Lučić kazala je da, gdje god krenu, sa sobom ponesu ljudskost, poštenje i ljubav prema znanju.
– Sveti Nikolaj Velimirović je zapisao: “Ne vrijedi čovjek onoliko koliko zna, nego koliko dobra u sebi nosi i koliko dobra drugima čini”. Neka vam ove riječi budu podsjetnik da se istinska sreća ne mjeri samo priznanjima, već i čestitošću i spremnošću da svojim djelima uljepšate svijet oko sebe. Budite hrabri u ostvarivanju svojih snova, čuvajte porodice, prijatelje i vrijednosti koje ste ponijeli iz školskih klupa, kazala je ona.
Učenik, Mateja Kišić kazao je da je atmosfera sjajna i da se osjeća veoma dobro.
-Najviše ću pamtiti svoje odjeljenje, jer smo uvijek bili dobri jedni prema drugima. To će mi definitivno najviše nedostajati, rekao je on.
Učenik, Lazar Lazić rekao je da će mu škola ostati u lijepom sjećanju.
-Najviše ću pamtiti prvih pet razreda sa učiteljom Brankom. Imali smo mnogo zanimljivih časova. Naravno, nedostajaće mi i društvo, rekao je on.
Osnovnu školu „Ilija Kišić“ završilo je 55 maturanata, od kojih je šest dobitnika priznanja „Luča“.
